చిన్న పిల్లలను చూస్తే ఎవరికైనా ముద్దు చేయాలనిపిస్తుంది. అందులో తప్పేమీ లేదు. కానీ ఆ ముద్దు చేసే విధానం తేడా కొడితే అది కాస్తా వివాదాస్పదమవుతుంది. బౌద్ధుల ఆధ్యాత్మిక గురువు దలైలామా ఇలాంటి వివాదంలోనే చిక్కుకుని చివరకు క్షమాపణలు చెప్పారు. ఈ ఏడాది ఫిబ్రవరి 28న దలైలామా ధర్మశాలలో జరిగిన ఓ కార్యక్రమంలో పాల్గొన్నారు. M3M అనే రియల్ ఎస్టేట్ కంపెనీ 120 మంది విద్యార్థులకు స్కిల్ డెవలప్మెంట్లో ట్రైనింగ్ ఇచ్చింది. అందులో భాగంగా దలైలామాతో ఆ విద్యార్థులంతా ఇంట్రాక్ట్ అయ్యారు. ఆ సమయంలో ఓ విద్యార్థి దలైలామా దగ్గరకు వచ్చాడు. పెద్దాయనతో ఆప్యాయంగా మాట్లాడాడు. అంత వరకూ బాగానే ఉంది. స్టూడెంట్ను దగ్గరకు లాక్కున్న దలైలామా నా నాలుకను ముద్దాడుతావా అంటూ దగ్గరకు తీసుకుని ముద్దు పెట్టబోయారు. ఆ దృశ్యాలు సోషల్ మీడియాకు ఎక్కడంతో నెటిజన్లు దలైలామా తీరుపై ఆగ్రహం వ్యక్తం చేశారు. ఇలాంటి చర్యలు పిల్లలను వేధించడం కిందకే వస్తాయని.. దలైలామా లాంటి వ్యక్తి ఇలాంటి పనులు చేయకుండా ఉండాల్సిందంటూ విమర్శలు గుప్పించారు.
